ОТИС-ийн ЧАНАРЫН БОДЛОГО, ЗОРИЛТ

Сургуулийн үйл ажиллагааг улсын хөгжлийн бодлоготой уялдуулан засаглал менежментийн тогтолцоог хөгжүүлж, хэрэглэгчийн хэрэгцээ шаардлага, тогтоосон шалгуур, стандартын дагуу чанартай хэрэгжүүлэн сургалт, судалгааны гүйцэтгэлийн болон чанарын удирдлагыг тасралтгүй сайжруулна.

Зорилт: 

1. Боловсролын үйлчилгээг чанарын удирдлагын менежментийн олон улсын стандартад нийцүүлэн чанарын дотоод баталгаажуулалтын тогтолцоог төгөлдөржүүлэх

2. Үр дүнд суурилсан төлөвлөлт манлайллыг хөгжүүлж, ажлын гүйцэтгэл, үнэлгээ, урамшууллын тогтолцоог боловсронгуй болгож, хүний нөөцийн тасралтгүй хөгжлийг хангах

3. Их сургуулийн өрсөлдөх чадварыг нэмэгдүүлж, үндэсний болон олон улсын түвшний эрэмбэ, чансаагаа ахиулах

4. Сургалт, судалгааны үйл ажиллагаанд шилдэг менежмент, арга технологийг нэвтрүүлэн хөгжүүлж, боловсролын үйлчилгээний чанар, хүртээмжийг олон улсын түвшинд ойртуулан нийцүүлэх

5. Оюутан болон төгсөгчдийн мэргэжлийн хөгжлийг хангах, нийгмийн хариуцлагыг нэмэгдүүлэх

ЧАНАРЫН БАТАЛГААЖУУЛАЛТ

Дээд боловсролын чанарын баталгаажуулалт нь сургуулийн сургалт, судалгааны гүйцэтгэлийн болон чанарын удирдлагыг сайжруулах зорилготой, нээлттэй, оролцогч талыг хамарсан тасралтгүй үйл ажиллагаа юм.

Чанарын баталгаажуулалтын талаар Дээд боловсролын тухай болон Боловсролын ерөнхий хуульд, дараах зохицуулалтыг тусгасан. Үүнд: 

12.6.Дээд боловсролын сургалтын байгууллага, Боловсролын ерөнхий хуулийн 12.5, энэ хуулийн 12.11-д заасан хөтөлбөр, тэргүүлэх, эрэлттэй мэргэжлийн сургалтын хөтөлбөрийг 5 жил тутам магадлан итгэмжилнэ.

12.7.Хуульд өөрөөр заагаагүй бол дээд боловсролын сургалтын байгууллага нь сургалтын хөтөлбөрийн чанар, нийцлийг сайжруулах зорилгоор Боловсролын ерөнхий хуулийн 12.5, энэ хуулийн 12.6-д зааснаас бусад тохиолдолд сайн дурын үндсэн дээр магадлан итгэмжлүүлж болно.

12.8.Шинэ хөтөлбөрөөр сургалт эрхлэхийн өмнө тухайн хөтөлбөрт урьдчилсан магадлан итгэмжлэл хийлгэнэ.

12.9.Дээд боловсролын сургалтын байгууллагын үндэсний эрэмбэ, чансаа, хөтөлбөрийн чанарыг энэ хуулийн 12.13-т заасан цахим сангийн мэдээлэлд үндэслэн олон улсад хүлээн зөвшөөрөгдсөн үнэлгээний байгууллагатай хамтран 2 жил тутам тогтоон олон нийтэд мэдээлнэ.

Чанарын баталгаажуулалтын хэлбэр

Магадлан итгэмжлэх үйл ажиллагаа нь боловсролын байгууллагын магадлан итгэмжлэл, боловсролын зэрэг олгох сургалтын хөтөлбөрийн магадлан итгэмжлэл, шинээр нээх сургалтын хөтөлбөрийн урьдчилсан магадлан итгэмжлэл гэсэн үндсэн 3 хэлбэрээр явагдана.

Байгууллагын магадлан итгэмжлэл нь тухайн боловсролын байгууллага Боловсролын магадлан итгэмжлэх үндэсний зөвлөлөөс тогтоосон шалгуур, шаардлага/стандарт/-ын дагуу чанарт эрх бүхий хөндлөнгийн байгууллага хараат бус үнэлгээ хийж, дүгнэлт гаргах үйл ажиллагаа юм.

Хөтөлбөрийн магадлан итгэмжлэл нь дээд боловсролын сургалтын хөтөлбөрийн чанарт тогтоосон шалгуур, шаардлагын дагуу эрх бүхий байгууллага хараат бус үнэлгээ хийх үйл явц юм. 

Урьдчилсан магадлан итгэмжлэл нь тухайн боловсролын байгууллагын шинээр нээх сургалтын хөтөлбөрийг Боловсролын магадлан итгэмжлэх үндэсний зөвлөлөөс тогтоосон шалгуур, шаардлага/стандарт/-ын дагуу хөндлөнгийн хараат бус үнэлгээ хийж, дүгнэлт гаргах үйл ажиллагаа юм.

Магадлан итгэмжлэгдсэн “ИХ СУРГУУЛЬ, ХӨТӨЛБӨР”-ийг сонгох шалтгаан

• Магадлан итгэмжлэгдсэн их сургууль, түүний хэрэгжүүлж буй хөтөлбөр нь магадлан итгэмжлэлийн шалгууруудыг хангасан чанартай үйл ажиллагаа явуулж байгааг батлан харуулна. 

• Иргэд өөрийн боловсрох хэрэгцээнд нийцсэн чанартай их сургууль, чанартай хөтөлбөрийг сонгохдоо ямар ч эргэлзээгүйгээр магадлан итгэмжлэгдсэн их сургууль, хөтөлбөрийг сонгох нь чанартай боловсрол эзэмших бүрэн боломжтой гэсэн баталгаа болно. 

• Сургалтын үйл ажиллагаа, хөтөлбөрийн чанар илүү сайжирна.

• Магадлан итгэмжлэгдсэн хөтөлбөрүүд нь олон улсын хөтөлбөрүүдтэй хамтарсан хөтөлбөр хэрэгжүүлэх нөхцөл бүрдэнэ. 

• Олон улсын чанарын баталгаажуулалтын байгууллагуудтай хамтран ажиллах, гишүүнээр элсэх, шинжээчдийг олон улсын сургалтуудад хамруулж, эрх олгох нөхцөл бүрдэнэ.

• Оюутны хувьд дотоодын их сургууль хооронд шилжин суралцах боломж бүрдэнэ. 

• Оюутнуудад дотоод, гадаадын сургуулиудад ахисан шатны сургалтад хамрагдахад эзэмшсэн мэргэжлийг нь хүлээн зөвшөөрөх, кредит шилжүүлэн тооцох, дүйцүүлэх, хүлээн зөвшөөрөх үндсэн шалгуур болно.

• Оюутнуудад төрөөс олгож буй хөнгөлөлт, буцалтгүй тусламж, оюутны хөгжлийн зээлд хамрагдах боломж бүрдэнэ.

• Бусад байгууллагатай харилцан үр ашигтай хамтын ажиллагааг явуулах итгэлцлийг бий болгоно. 

• Магадлан итгэмжлэгдсэн сургуулиуд хэрэгжүүлж буй хөтөлбөрүүдийг харилцан хүлээн зөвшөөрөх нөхцөл бүрдэнэ. 

• Магадлан итгэмжлэгдсэнээр дотооддоо төдийгүй улс хооронд дээд боловсролыг хүлээн зөвшөөрөх, кредит цагийг дүйцүүлэн тооцох үндэс суурь тавигдаж, оюутан сурч буй хөтөлбөрийн чиглэлээр анги, курс, эзэмшсэн мэргэжил, эрдмийн зэрэг зэргийг гадаадын их, дээд сургуулиудад хүлээн зөвшөөрч, дүйцүүлэн үргэлжлүүлэн суралцах болон боловсролын зэргээ ахиулах боломжийг бүрдүүлж байгаагаараа ихээхэн ач холбогдолтой.